Thingsulthliah HSS-a zirlaite'n kea Aizawla kalin CM lehkha pek an tum

Thingsulthliah Higher Secondary School-a zirlaite chuan an sikul lumpsum grant-in-aid aṭanga adhoc grant-in-aid dinhmuna hlán kai tura ngenna lehkha Chief Minister leh School Education Minister pe turin an khua aṭanga Aizawla kea kal an tum a; an hmalakna hi an nu leh pate pawhin an thláwp.

Thingsulthliah HSS-a zirlai nu leh pate September 14, 2023-a ṭhukhawm chuan, an fate'n chhungkua, khawtlang leh sikul vei tak takna an nei chu lawmawm an tih thu an tarlang a, "Hmalak an duhna hmasa, Aizawlah kea kal a, Chief Minister leh Education Minister hnena adhoc ngenna lehkha pek leh a ṭul huna chaw nghei pawha nawr an inhuamna chu lawmawm kan ti a, an thâ tichak turin kan thláwp tlat dawn a ni," an ti.

Thingsulthliah HSS Students Union hian adhoc dinhmuna dah tura sorkar thuneitute hnena ngenna lehkha pe tur hian khaw awm dan leh boruak thlir chungin chawlhkar lehah kein Aizawla kal an tum a; zirlaite hmalakna chu zirlai nu leh pate kal khawm chuan thláwpin, kea zirlaite an kal hunah an hnungah lirthei nena kal ve an rél a ni.

Nu leh pate kal khawm chuan, Joint Action Committee thâ tichak tur leh hma an lakna atan pawisa thawh khawm an rel a; JAC-te chu a hma lama School Education Minister hmu a, Council of Ministers ṭhukhawmin an chungchang an rel hlawhtlin ngei theih nan lamkal intir tura ngena ngen an rél bawk.

Thingsulthliah HSS-ah hian zirlai 156 an awm a, thawktu 13 an awm mek a ni.