Passenger-te himna tur hmanrua hawng: Inland water project lungphùm phùm a ni

Transport minister TJ Lalnuntluanga chuan nimin khan Transport directorate-ah Vehicle Location Tracking & Emergency Alert System (VLTEAS) Control and Command Centre a hawng a; Khawthlangtuipui leh Tuichawng lui inkar km. 23-a kalpui tur inland water transport (IWT) project lungphùm a phúm bawk.

Sorkar thuchhuah tarlan danin, Transport department chuan September 9, 2023 khan notification a chhuah a, mihring phur chi sumdawng lirthei, Vehicle Location Tracing Device (VLTD) vuah lo leh tinung lo chu register phal a ni tawh lo. September 1, 2019 hnu lama lirthei ziah luhte chu VLTD vuaha an hman loh chuan registration, permit, adt. tihnun nawn (renew) theih a ni tawh dawn lo. Hei hian auto-rickshaw leh two wheeler taxi a huam lo thung.

VLTD hi lirthei chhunga passenger-te hmeh mai theihna tur remchang laiah vuah tur a ni a; passenger-te'n harsatna/buaina an tawh chuan hmeh tur a ni. An hmeh rualin Command & Control Centre, Transport department leh ERRS (police)-in an hre nghal thei a, lirthei awmna hmun rang takin an hre thei dawn a ni.

Khawthlangtuipui leh Tuichawng lui IWT project hi Coastal Consolidate Structure Pvt. Ltd., Andhra Pradesh-in an thawk dawn a, July 17, 2023 aṭanga thawh ṭan tura tih tawh niin, agreement ziah leh ṭul dangte chu September 2023 chhunga peih hman beisei a ni. Project atan hian forest clearance hmuh a ni tawh.

TJ Lalnuntluanga chuan, VLTEAS hman a ni dawn ta chu Mizoram tan méllung pawimawh a nih thu a sawi a, "Ram zalen leh ralmuang kan ni chungin lirthei hmangtu zingah vanduaina tâwk an awm ṭhin a, ka hnena thlente pawh an awm. VLTEAS hi passenger-te himna atan mai bakah, thil sual titute chhuina kawngah police-in an chhawr ṭangkai ngei ka ring," a ti.

Transport Minister chuan, IWT project atan sorkar laipuiin cheng vbc. 22 vel a ruahman thu sawiin, "Open tender hmangin a thawktu tur thlan a ni tawh. Project dang pawhin min tihlawm rualin, he project-in min tihlawm zualna chu, a hlawhtling a nih chuan ramri buai palhah mamawh lakna kawngah harsatna kan tâwk tawh dawn lo," a ti a, a hlawhtlin hun a nghahhlelhawm thu a sawi.

Ram hruaitu leh sorkar official kal tawhte'n theihtawp an chhuah tih sawiin Lalnuntluanga chuan, "Kan mi hmasate khan ram tan theihtawp an chhuah a, hmasawnna pawh kan hmu nasa tawh. Tuna mite'n kan chhunzawm zel dawn a, kan ram hmabak hi a êng. Kan rilru put hmang thlakin, hmasawnna ruhrel din kawngah leh intodelhna kawng ṭan kan la a, mahni kea din theih kan tum," a ti.