Kan corrupt ve dawn lo - Lalsawta

MPCC president Lalsawta chuan, Congress party chu kumkhuain India leh Mizoramah sakhaw zalenna champion puitu nia sawiin, an sorkar chuan an corrupt dawn lo niin a sawi.

Lalsawta hian nimin khan nimin khan Kawnpui leh Lungdaia Tuirial bial campaign hawnna a hmanpuinaah thu sawiin, BJP duh dana India ram puma sakhaw khat, Hindu-a luan khawm an duh tih a sawi a, Congress party hi kum khuain India leh Mizoramah sakhaw zalenna champion puitu kan ni a, kan ni reng ang," a ti.

MPCC President chuan, sakhaw zalenna kuai thlep tur leh an duh dan dana kuai her turin BJP-in tualṭo party-te hmanruaah a hmang nasa nia sawiin, "Chutiang chu tuna MNF an kalpui dan a ni a, BJP a hnìm hnai hreh lo," a ti a, sorkar tuma hmanhlel ve party dang pakhat pawhin BJP an hmu tâi hle niin a sawi.

Party dang pakhatin BJP an hmuh taih chu corrupt an duh vang nia sawiin Lalsawta chuan, "Keini erawh kan corrupt ve dawn lo. MLA emaw minister pawh ni se, Congress sorkarah chuan kan corrupt dawn lo. Eng emaw vangin lo corrupt tum mahse kei chuan ka dìm dawn lo," a ti.

Congress President chuan, ramin harsatna hrang hrang a tâwk nia sawiin, "Ṭhut mai mai theih a ni lo. Sual a chak zawk theihna tura thil pawi tak chu mi ṭhate'n engmah an tih duh loh hi a ni. Politics a ṭha lo tia tel vena tlakah an ngai lo a nih chuan an ngaihnêpte hnuaiah an kûn dawn tho," a ti a; Congress party innghahna chu sum ni loin Pathian a nih thu leh Mizoram tan sorkar ṭha an siam thei tih an hriat chian thu a sawi.

Inkhawmah hian Tuirial biala INC candidate tur Dr Henry Zodinliana pawhin thu a sawi a, Tuirial bialah Congress an chhe ngai lo nia sawiin, "He bial aṭang hian kan ram, kan hnam leh kan sakhua himna turin bial mipui thil ṭha duhte nen bul kan ṭan dawn a, Mizoram hi hei aia sangah kan tungding dawn," a ti.