Bill táng mek leh damlote tan ZPM sorkar hun a nghahlelhawm - Lalduhoma

ZPM Champhai North Block chuan nimin khan Champhai Kanan Venga PD Sena Memorial Hall-ah Party Meet an buatsaih a; ZPM leader Lalduhoma'n hmanpuiin, damlote leh bill táng nei mekte'n ZPM sorkar hun an nghahhlelh thu leh ZPM an sorkar chuan tar pension an tihpun tur thu a sawi.

Lalduhoma chuan, sorkar leiba tam tak inchhêk khâwl mek chu sorkar lai mek leibá chauh ni loin, sorkar hmasa aṭanga inchhêk khâwl chho zel a nih thu a sawi a, "Kan leibat zat hi a cheng zata sawi tur a ni lo a, GSDP aṭangin za zelah engzat nge ni tih chhût zawk tur a ni a, RBI chhût dan hi rin mai tur. Chhiarkawp dik lo zawnga mipui hrilhfiaha bum tum hi thil dik a ni lo. Bill táng mekte leh damlote tan ZPM sorkar hun a ngahhlelhawm hle. ZPM a sorkar chuan inrenchem kan inzirtir dawn," a ti.

Tun hnaiah Mizoramah political revival a thleng nasa nia sawiin Duhoma chuan, "Ṭhalaite an harh a, foreign-a awmte thlengin an ZPM ta vek mai niin a lang hial. Nute'n ram an vei a, upate'n politics an ngaihven mai ni loin kan zingah min rawn ho ṭhin hi a ropui," a ti a, ZPM a sorkar a nih chuan tar pension Rs 1,000-ah an tihpun tur thu a sawi.

ZPM Leader chuan, ZPM chu an danglam tur a nih thu sawiin, "Puipunnaah mi dangte kal khawm anga zu nena tih luih luih a rem ve lo. Zu in mi pawhin a hun leh a hmun an hre ve tur a ni. Kalphung thar kan inzirtir mek laia zu leh sa nena puipunnaa rawn chêt vak vak a rem lo. ZPM-te chu kan felfai tur a ni," a ti.

Inkhawm hi ZPM Champhai North Block president Hrangchalliana'n a kaihruai a, Champhai North-a ZPM candidate tur Ginzalal Hauzel leh Champhai South biala candidate tur Clement Lalhmingthanga te pawhin thu an sawi. An party thuchhuah tarlan danin, ZPM Leader hian an party-ah mi 602 a lawm lut a ni.