Zirtirtu atan a thiam leh fit ngei lâk ṭhin a ni - Education Minister

School Education minister Lalchhandama Ralte chuan nimin khan Vairengtea Samagra Shiksha Higher Secondary School science stream building sak thar a hawng a; zirtirtu atan a thiam leh tling ngei lâk ṭhin a nih thu a sawi.

Lalchhandama Ralte chuan, sorkarin zirna tihhmasawnna atan theihtawp a chhuah thu sawiin, "Serlui bialah pawh zirtirtu ṭhahnem tak dah belh an ni. Zirtirtu hna lakah a thiam leh fit ngei lak ṭhin an ni. Tunlai khawvel hmasawn zelah science thiamna a pawimawh a, Vairengte khawtualah science zir theihna a awm ta hi a lawmawm," a ti.

Covid-19 leng avangin Mizoram sorkarin central aṭanga sum a hmuh tur cheng vbc. 3,000 vel a hmuh lo nia sawiin Minister chuan, "Covid hripui bakah lirnghing, ramri buai, vawk pul hri lengte'n min tibuai a, a chhunga chengte bakah ṭhenawm ram aṭanga raltlan 50,000 dawn châwm an ngai bawk," a ti a; harsatna hrang hrang karah Mizoram sorkar tluang taka a kal thu a sawi.

Education Minister chuan, sum leh pai awm ang ang zirna atana hman sorkarin a tum thu leh sorkar hmalaknate chu mipuiin thlàwp se a duh thu a sawi a; zirtirtute chu zirlaibu piah lamah zirtlak zirtirtu ni tur leh zah phu ni turin a chah.

Bialtu MLA Lalrinsanga Ralte pawhin thu sawiin, MNF sorkarah zirnain hma a sawn nasa nuiin a sawi a, "Vairengte mipui leh zirtirtute pawh sorkar chungah an lawm. Duhthusam ni lo mah se, zirtirtu pawh an indaih ta a, sorkar sikul pawh naupangin an bawm a, a lawmawm hle a ni," a ti.

Vairengtea HSS science stream building sak thar hi floor 4 a ni a, sum sen zat chu Rs 1,57,77,150.65 a ni. A dung ft. 75 leh a vang ft. 23 niin, principal room, staff room, class room pahnih, library, laboratory room pathum leh art & craft room-te a awm.