Kan sorkar leh ngei kan ring nghet - MNF Vice President

MNF vice president Vanlalzawma chuan nimin khan Mizo Hnam Runa inkhawmah thu sawiin, Mizoram inthlanpuiah MNF party chakin an sorkar leh ngei a rin thu a sawi.

Vanlalzawma chuan, Mizoram inthlan atan campaign committe an tawh thu sawiin, "Kan party president kaihhruainain hmalakna tur hrang duan a ni a, theihtawp kan chhuah mek zel. Inngaitlawm leh thuhnuairawlh taka kan hmalakna hrang hrangte Pathianin mal a sawm ngei kan ring a, kan sorkar leh ngei kan ring nghet tlat a ni," a ti.

MNF Vice President chuan, New Siaha-a biala MDC by-election neih turah MNF candidate tur chu Nelson Khenglawt a nih thu a sawi a; MDC by-election ah chuan MNF khingpui tur ber chu BJP an nih thu a sawi bawk.

Inkhawmah hian MADC-a MDC Lalmalsawma Zasai pawhin thu a sawi a, "MLA ticket chan loh vang emaw, duh tâwk contract hmuh loh vanga chhuak mai mai tur kan ni ve lo, kan inkhengbet ve ngawt tur a ni lo. Hnam poltics, policy mumal tak nei MNF party hi a ding nghet zel dawn," a ti.