Dy CM-in hmeichhe hostel a hawng

Samagra Shiksha hnuaia din Netaji Subhash Chandra Bose Awasiya Vidhyalaya Girls Hostel, Khawzawla mi chu nimin khan bialtu MLA Tawnluia, deputy chief minister-in a hawng.

Hostel tharah hian seat 30 a awm a, high school aṭangin mi 10 leh higher secondary school aṭangin mi 20, an vaiin naupang 30 an awm dawn. Hostel-a awm zirlaite mamawh chu sorkarin a tum vek dawn a, an chak lohna subject-a pui turin tuition fee pawh a tum sak dawn a ni.

Hostel hawnna inkhawm Khawzawl HSS-a neihah Tawnluia chuan, Khawzawl chu district headquarters a nih hnuah khawpui leh khaw lian a nih angin a mamawhte a pung zel tih a sawi a, "Khawzawlin district a hmuh theihna atan leh district tih puitlinna kawngah mipuite duhsakna dawnga theihtawp chhuah thei dinhmuna ka ding hi ka lawm hle," a ti.

Deputy CM chuan, district'n fuke leh ban tam tak a keng tih sawiin, "Péng pawimawh tak pakhat, zirna lama hmasawnna a awm theih nana hma latu District Education Officer-in Khawzawl a thutchilh chu a vanneihthlak hle," a ti a, hostel zirlai naupangte security deposit a tumsak tur thu a puang.

Khawzawl HSS principal Joseph Zonun-mawia sawi danin, hostel hawn tak Mizoramin Netaji Subhash Chandra Bose Awasiya Vidhyalaya hnuaia hostel 11 siamna tur a hmuh zinga pakhat a ni.