TRC-ah ruihhlo ṭhat lohzia zirtir

Aizawl District Task Force on Ruihhlo Do chuan nimin khan T Romana College-ah ruihhlo ṭhat lohzia inzirtirna an buatsaih a, District Task Force on Ruihhlo Do chairman Nazuk Kumar, Aizawl bawrhsapin a hmanpui.

Nazuk Kumar chuan, ruihhlo ṭhat lohzia sawiin, zirlaite chu ruihhlo ti chhin lo tur leh ruihhlo laka inthiarfihlim turin a chah a; ruihhlo donaa YMA hmalakna leh hnathawhte ropui a tih thu a sawi.

Drug Abuse Prevention Awareness-ah hian TRC principal Dr Jenifer Lalbiakdiki leh Aizawl District Task Force on Ruihhlo Do member secretary Prof. Malsawmliana te pawhin thu an sawi a; Mizoram Social Defence & Rehabilitation Board master trainer Vanlalhruaii'n zirlaite hnenah ruihhlo ṭhat lohzia a zirtir a ni.

Aizawl District Task Force hian Aizawl district-a zirna-in tinah ruihhlo ṭhat lohzia zirtirna kalpui turin hma an la a, a thawh khatnaah higher secondary school leh college-ah awareness programme an kalpui a, high school, middle school, primary school leh kohhran hrang hranga tleirawl inkhawmah zirtirna kalpui zel an tum a ni.