KHAWTHLIR

Thisen pe

Pachhunga University College (PUC) NCC chuan nimin khan an hmunah thisen pek an huaihawt a, Civil Hospital, Aizawl tan thisen unit 171 an pe a, petute mipa 137 leh hmeichhia 34 an ni. Nimina thisen an pek hi PUC-in academic session kal mekah blood donation camp an buatsaih ṭum lina a ni.

Minister-in hmanpui

Mizoram Polytechnic, Lunglei Students' Union buatsaih 42nd Technical Week chu nimin khan an multipurpose hall-ah khârna a ni a, kharna inkhawm hi minister C Lalrinsanga'n hmanpuiin, rinawmna, taimakna leh chhelna nen an zirlai zir turin zirlaite a chah.

Voter awarness

Kumin kum tawp lama MLA inthlanpui awm tura inpuahchahna kal zelah Election Office, Champhai district hmalaknain nimin khan Champhai khawpui chhung hmun hrang hrangah EVM Mobile Van kaltlangin voter awareness neih a ni.

Jubilee lawm

Chawnghmingliani Memorial High School chuan nimin khan Kolasib College Veng YMA Hall-ah an sikul silver jubilee an lawm a, Education minister Lalchhandama Ralte leh bialtu MLA K Lalrinliana, minister-in an hmanpui. Chawnghmingliani Memorial H/S hi February 3, 1998 khan din a ni a, headmistress leh thawktu pariat hnuaiah zirlai 103 an awm mek.

CM hoin thukhawm

Mizoram Science, Techno-logy & Innovation Council Governing Body chu nimin khan an chairman Zoramthanga, chief minis-ter hoin CMO conference hall-ah an ṭhukhawm a, an hmachhawp leh MISTIC thuam chak zelna tur thil hrang hrangte an rêl.

Hnam Rûn hawng

MNF adviser Dr R Lalthangliana chuan nimin khan a bial chhunga Hnahthialah MNF pisa, sak thar a hawng. In hi Hnahthial Penial Venga awm a ni a, chhawng ngaa sang a ni. Dr R Lalthangliana hian nimin vek khan Hnahthiala RD Conference Hall-a MNF South Tuipui Block Meet a hmanpui.