Kartawp La Liga - hmuhnawm leh ngaihnawm a awm dawn!

International break a zo a, European league te pawh an khel ṭan leh tawh dawn - European top five league zinga ngaihven hlawh La Liga pawh khelh a ni leh tawh dawn a, inkhel hmuhnawm en turin min hmuak.

Zanin dar 7:45 hian Valencia chuan Atletico Madrid an mikhual dawn a, Spanish club lian pahnih inchal tauh tur hi en a châkawm - zan dar 12:30-a Barcelona-in Real Betis an mikhual tur pawh hi inkhel hmuhnawm beisei ngam a ni.

Pathianni zanah Real Madrid an inlan dawn a, zan dar 12:30-a an mikhual tur hi Real Sociedad an ni. Sociedad hian tun season-ah beisei angin season ṭan lo mah se, team ṭha an nihna erawh en kan a rem lo a, Real tan chetsual theihna tur an ni.

Tun season-a league match thum an khelh tawhah Sevilla an tlawm vek a, hei vang hian Pathianni zan dar 10:00-a Las Palmas an mikhual tur hian ngaihven a hlawh - tho chhuak thei tawh tak ang maw?

Valencia vs Atletico

Atletico Madrid-in tun season-a an league match hmasa berah 3-1 in Granada hneh mah se, Real Betis lakah goal an khung thei lo zui a, point khat nen an haw. Mahse, an league match thumnaah chuan Atletico hi an insiamṭha chiang hle.

Rayo Vallecano chu khualmualah 7-0 ngawtin an sawp a, Sevilla nena an inkhel tur erawh ruah sur nasat avangin sawn a ni. Hei vang hian Atletico player-ten chawlh hahdamna hun an ngah bik a, zanina Valencia lenchilh turin an inpeih khawp ang.

Atletico tan tlarhmaa Alvaro Morata inkhel tur hi en a châkawm - Spanish striker hian tun season league match thum an khelhah goal thum a khung a, international break-ah Spain tan hattrick a siam bawk.

Hetihlai hian season bul ṭanpuitu Yannick Carrasco chu Saudi Arabia lamah a pem a, Memphis Depay, Koke leh Jose Gimenez te hliam vangin an inlan thei lo bawk - Valencia hi an league match hmasa pahniha an chak hnua, a zawna match hnih chak lo leh tawh an ni a, an mikhual Atletico lakah insiamṭhat an tum ang.

Hei le Barca

Barcelona-in tun season league match hmasa berah Getafe inhnehtawkpui mah se, a hnu match thumah hnehna an chang leh vek tawh a, goal riat ngawt an khung - an lamah goal li a luh ve avangin tlarhnung lam erawh inenfiah an mamawh.

Catalan club tan season ṭantira goal khung harsat Robert Lewandowski chuan an league match hnuhnung pahnihah goal a khung leh ta bawk a, Polish striker hi a 'form' phawt chuan La Liga champion team tan hlauh tur an awm bik lo.

Chutihrual chuan Real Betis hi coach ṭha Manuel Pellegrini hnuaiah hmachhawn an châkawm lo - Manchester City boss hlui hian Betis hi football hmuhnawm a khelhpui a, 2021-22 season-ah phei kha chuan Copa del Rey champion a nihpui.

Betis hian Nabil Fekir, Isco, Borja Iglesias leh Hector Bellerín te ho an kawl a, he team hian theihna an nei tih a chiang - Barcelona khelmual meuh luhchhuah turin an ṭha tawk em, tih erawh zawhna a awm.

Real hmaah Real

Real Sociedad-in tun season-ah beisei an phak lo - an league match hmasa pathumah an khingpui an inhnehtawkpui vek! Mahse, Imanol Alguacil-a enkawl team hian an match hnuhnung berah Granada chu 5-3 in an sawp a, an inringtawk leh tawh hle.

A tawi zawnga sawi chuan Real Madrid hian an hmachhawn tur team duh thlang dawn se, Sociedad hi an thlan hmasak pawlah an tel lo ang - chutihrual chuan Real chu 'Real' an ni miau a, Carlo Ancelotti naute hian rin an hlawh zawk lo thei lo.

Real Madrid hian an league match khelh tawh paliah hnehna an la chang vek a, goal riat ngawt khung tawhin, an lamah goal hnih chiah a la lut. Chutihrual chuan Real hian team khauh tia sawi tur hmachhawn an la nei lo.

Season hman zawh takah Real Madrid-in an nomawi chu Barcelona lakah an chân tawh a, tun season-ah chân nawn an duh dawn lo - chumi tur chuan Madrid khaw club tan chetsual a thiang lo a, league match lia goal nga khung tawh Jude Bellingham bawkin en bik a hlawh leh ang.