Rengdil-in kuhva aṭangin nuai 180 chuang la lut

Mamit district-a Rengdil khua chuan kuhva an thar ṭha hle a, kum 2015 chhung khan kuhva aṭangin cheng nuai 180 vel an la lut niin an sawi.

Rengdil North YMA presi-dent C Lalthanhnuna, Rengdil Arecanut Grower Association secretary ni bawk chuan, kuhva chíngtute'n sum an lak luh ṭhat avangin khawtlang an phûr a, ṭhalaite pawhin hna an thawh nasat phah thu leh, Rengdilah chhungkaw 200 velin kuhva an chîn thu a sawi.

C Lalthanhnuna'n Vanglaini a hrilh danin, kuhva chu a rah laiin vai hoin a man awm tâwkin an leisak a, khaw ṭhenawm Mamit, Kawrthah, Tuidam leh Zawlnuamahte kuhva chîngtute'n an pe chhawng ve bawk.

Rengdil khaw mite bikin kuhva an hralhna aṭanga kum 2015 chhunga sum an lak luh zawng zawng chu Rs. 18,724,800 a ni a; an khaw rama khaw dang mi chhungkaw pahnihin Rs. 4,85,000 an la lut bawk. Heti hian, nikuma chhungkaw 200 velin sum an lak luh zawng zawng chu Rs. 19,209,800 vel a ni.

C Lalthanhnuna chuan, Rengdil khuaah kum 1969 vel aṭangin kuhva chîng ṭanin, kum 1990 velah kuhva man a náwlpuiin an tél ṭan tih a sawi a, "Phun aṭanga kum ngana velah lawh ṭan theih mah se, kum 10 hnuah a hlawkna tak tak têl theih a ni," a ti. Kuhva man an lak luh ṭhat avangin kut hnathawktute'n thlai dang chîn an phûr phah a, red oil palm leh ṭhelrêt chîng thar an tam zual tih a sawi.

Kuhva rah hi kung pathum aṭanga pangaah ip khat zel a awm angin an chhût a, ip khat man chu Rs. 2,000-2,500 vel a ni. Khaw tualah chuan Rs. 500-in pum 400 an hral ṭhin.

Rengdil Arecanut Grower Association-ah hian member 137 an awm a, sorkar aṭanga
ṭanpuina dawng loin kuhva man an tél mek. NLUP tih ṭan tirh lamah kuhva thlang mi tlem azawng an awm a, mahse NLUP hniaia kuhva thlangtute chuan a rah an la seng lo.

Rengdil Arecanut Grower Association-in kum 2015 chhunga kuhva man aṭanga sum lak luh an chhinchhiah dan chuan, chhungkaw paliin Rs. 500,000 - 10,00,000 vel an la lut a; chhungkaw 60-in Rs. 1,00,000 - Rs. 4,99,999 inkar, chhungkaw 27-in Rs. 50,000 - Rs. 99,999 inkar, chhungkaw 62-in Rs. 10,000 - Rs 49,999 inkar, chhungkaw 28-in Rs. 5,000 - Rs. 9,999 inkar, chhungkaw 29-in Rs. 1,000 - Rs. 4,999 inkar an la lut a ni.