HPC(D) kah hlum police thi chhungte'n hlawh la zui dawn

6th January, 2016

March 28, 2015-a Zokhawthiang dáia Assembly Committee on Government Assurance member-te leh anmahni zuitute lambunnaa thi police pathumte hlawh chu, an rokhawm tura ruatte'n an la zui dawn.

Home minister R Lalzirliana chuan, thi police-te hlawh chu an rokhawm tura tihte'n an lak zui reng dawn thu hi nimin khan Excise & Narcotics department conference hall-ah a sawi a, "Hlawh a pun pawhin, police thi tate hlawh hi a pung ve zel ang. An pension hun a thlen pawhin, pension hlawh an nei zui zel dawn a ni," a ti.

Home Minister chuan, rinawm leh taima taka hnathawkte chu sorkarin a hriat thu a sawi.