BJP-in Mizoramah sorkar an tum Bawng talh khap an hriatthiampui

BJP Mizoram Pradesh president thar Prof. JV Hluna chuan, Mizoramah BJP a sorkar theih nan ṭan an lak dawn thu a sawi a; India ram state ṭhenkhata bawng talh khap a nih chungchangah, bawng chu Hindu-te pathian pakhat a nih avangin Mizoram ni lo state
ṭhenkhatin bawng talh an khap chu a hriattthiampui thu a sawi.

Prof. JV Hluna leh BJP hruaitu
ṭhenkhatte chuan nimin khan Aizawl Press Club-ah thuthar thehdarhtute kawmin, thingpui an inpui a; JV Hluna chuan, Mizoram BJP inthlan chu boruak tha tak hnuaia neih a nih thu sawiin, "January 12, 2016-ah kan office kan hawng ang a, chutah chuan office bearer dangte hming puan chhuah a ni ang," a ti.

Mizoramah BJP a sorkar theih nan
ṭan an la dawn tih sawiin, "Chief minister Pu Lal Thanhawla hi CM rei tak a ni thei a, kan zah hle. Mahse, thlak a ngai tawh," a ti a; Mizoram political party-ah team
ṭha tak an din dawn thu a sawi.

Tun hmain company lianah BJP hminga pawisa khawn a awn ṭhina sawi a nih thu sawiin, JV Hluna chuan, "Vawiin aṭang chuan sumdawngte leh company-ah BJP hminga pawisa khawn a awm lo ang," a ti a; Prime Minister Narendra Modi-a'n eirukna a duh lo tak zet tih sawiin, "BJP hotuteah corruption a awm lo ang," a ti bawk.

India ram state ṭhenkhata bawng talh khap chungchanga a ngaihdan zawhna chhangin, Prof. JV Hluna chuan, "Hindu-te hian bawng hi pathianah an nei tlat mai a, bawng sa ei hian an na ve ṭhin a, chu an rilru chu hriatthiampui a ngai ve. Hindu tam berna state ṭhen-khata bawng talh an khap hi âwm ka tihpui a, Congress-ah pawh Hindu kulmût an awm ve tho a, bawng talh avangin an na ve tho a ni," a ti a; bawng talh chungchanga Hindu-te rilru chu hriatthiampui an ngaih thu a sawi.

MIzoram BJP President hi BJP National Executive member a ni nghal a, National Council member atan Lianzuala, Electric Veng, Aizawl ruat a ni.