Project duan dan tur sawiho
NITI Aayog (Finance Commission thlaktu) hnuaia hmarchhak state huam chhunga Sixth Schedule areas tana hmasawnna sum hai chhuah nana project duan dan tur ngaihtuahin State Planning Board vice chairman H Liansailova hoin NLUP conference hall-ah nimin khan Autonomous District Council hotute bakah department a kaihhnawih department hotute an ṭhukhawm.
H Liansailova chuan, Mizoram tihhmasawnna atan sorkar leh mimalte'n theihtawp an chhuah mek thu sawiin, "Retheite chhanchhuahna sum a awm a, hna thawh dan tur leh hmalak dan tur kan chhawpsak a ṭul. Hmanraw changkang, technology sang lutuk hman kher a ṭul lo, thil tam tak tih tum lo a, tih mai theih tih zung zung chuan kan ram hmel a tidanglam thei dawn a ni," a ti.
Ram hmasawnna tur leh retheite chawikanna tura sorkar hmalaknate a hlawhtlin theih nan officer-te an tui tlân a ngaih thu sawiin H Liansailova chuan, "Kan hnathawh dan leh hmalak dan phung te a ṭul anga kan tihdanglam a, kan inher rem thiam a pawimawh," a ti. Sum tam tak sênga ram mipuite tana sorkar-in hma a lakna kawng hrang hrangah khawi lai nge kan tlâkchhamna lai hre chiang a, mipui vantlang hlâwkpuina leh chhawr ṭangkai theih tura hmalak zel a pawimawh thu a sawi bawk.
Planning Board member-secretary PL Thanga chuan, 6th Schedule hnuaia mite tana sorkar laipuiiin sum ṭhahnem tak a dah hai chhuah nan project rang taka duang a, sorkar laipuia thehluh thuai a ngaih thu a sawi.
Meeting chuan Sialkal tlangdung te, Sinlung Hills Development Council leh Reang Development Area-te huam tela vantlang mipui mamawh uluk taka chhûta project duan ni se, an ti. Vantlang hriselna inenkawlna te, inkalpawhna kawng siam te, zirna sikul tihchangtlunna te, mipui eizawnna kawng ngaihtuahsakte leh ṭul dangte ngaihtuah chunga project uluk taka siam an rel a ni.
Meeting-ah hian ADC hotute bakah Planning Board, PWD, PHE, Finance, Planning & Programme Implementation, School Education, Health & Family Welfare, Agriculture, Horticulture, Minor Irrigation, Disaster Management & Rehabilitation, Geology & Mineral Resources, Soil & Water Conservation leh Sports & Youth Services department hotute an tel a ni.