2015 chhungin Kolasibah Thubuai 159 ziahluh a ni

Kum 2015 chhung khan Kolasib Police Station-ah thubuai 159 ziah luh a ni a, kum 2014 aiin rûkrûk leh mi in rawk thubuai ziah luh a pung. Kawnpui Police Station-ah thih dan pangngai loa thihna case 14 ziah luh a ni.

Kum 2015 chhunga Kolasib PS-a thubuai ziah luh zinga 112 chu rûkrûk leh inrawk thubuai a ni a; naupang kumtlinglo khuaikhem thubuai pa-nga ziah luh niin, pawngsual thubuai pathum a awm. MLPC Act bawhchhiatna thubuai ziah luh pakhat a awm a, sorkar laka hel tum thubuai pakhat ziah luh niin, mahni in chhunga buaina siam mi 33 manin an zilhhau. Hetih lai hian, tualthah thubuai a awm lo thung.

Kawnpui PS-ah chuan kum 2015 chhung khan thih dan pang-ngai loa thihna (unnatural death) case 14 ziah luh a ni a, kum 2002 aṭangin unnatural death case 108 ziah luh a ni tawh. Kum 2015 chhunga unnatural death case 14 zinga pasarih chu inâwk hlum nia an ni a; lirthei chesual vanga thi mi pali, chhan hriat loha thia chhar mi pahnih, electric current-in a man hlum mi pakhat leh Tlawng luia tla hlum mi pahnih an awm.