YCA-in General Conference hmang mek

Young Chakma Association (YCA) General Conference vawi 38-na chu nimin khan Nunsury khuaah ṭan a ni a, hriat theih chinah Mizoram chhung leh páwn aṭangin palái 700 chuang an inziak lût tawh.

YCA General Conference hi West Tuipui bialtu MLA, Nihar Kanti Chakma-in a hmanpui a; palai kalkhâwmte hmaah thu sawiin NK Chakma chuan, "Hnam din chhuah nan intodelh a pawimawh a, mimal leh hnam ang pawhin kan mamawh ber a ni," a ti.

Nihar Kanti Chakma chuan, taimakna leh thawhrimna ngaihhlut nacháng hria hnam an boral ngai lo tih a sawi a, "Hnam zia leh tih dan phung humhalh kawngah kan mawhphurhna pawimawhzia kan hre reng tur a ni," tiin, YCA member-te chu changkânna inei raltir lo turin a chah.

West Tuipui MLA chuan Chakma-te chu sorkar hnuaia hna sáng thawk tura inchher hriam turin a chah a, "Competitive exam lamah nasa taka tan kan lâk a ngai a, MPSC leh UPSC hnuaia exam hrang hranga inziak tling turin taimâkna nen tan kan lâk a pawimawh," a ti.

YCA General Conference-ah hian Mizoram, Assam leh Tripura-a YCA branch 141 aṭangin palai 700 an inziak lût tawh a, Ningani-ah rorel inkhawm neih a ni ang a, Ni-ngani zanah conference a ṭiak ang.