Larsapin AFC duhsakna a hlan

Governor Lt.Gen. Nirbhay Sharma chuan nimin khan Raj Bhavan-ah I-League khel tur Aizawl Football Club hotute leh player-te léngah sáwmin thingpui a inpui a, hlawhtlinna chang ngei turin duhsakna a hlan.

Governor chuan, Aizawl FC-in I-League-ah a vawi khatna atan an tel thei chu Mizoram tan inchhuanna tham thil ropui tak a nih thu a sawi a; India football club lian ber berte zingah pawh inthlahrung lo a, an theihna zawng zawng phochhuak tura fuihin, "Aizawl FC tan Mizo mipuite thlawpna leh duhsaknate a pawimawh dawn a, an hlawhtlinna zin kawngah tumruhna petu a ni ang," a ti.

Mizo mipuite’n páwn lam nen nasa zawka indâwr a mamawh thu sawiin Larsap chuan, "Kan rilru inhawng zau zual zel se, hlawhtlinna nasa zawk kan la hmu zel ang," a ti a; Mizo
ṭha-laite'n an rilru a tumna an neih phawt chuan eng thilah pawh hlawhtling theih turin theihna an neih thu a sawi.