PPE lei dan chhui chian a ni dawn

Personal protective equipment (PPE) ṭha lo Mizoram sorkarin a lei chungchang chu Mizoram Lokayukta-in chhui a remti a, a bawhzui hna (preliminary enquiry) chu Anti Corruption Bureau (ACB) kutah a dah niin Congress party chuan an tarlang.

PPE lei chung-changah hian Congress party chuan an Media department secretary C Lalhriatpuia hmingin May 1, 2020 khan ACB-ah FIR an thehlut a; Lokayukta chuan PPE lei dan leh hmanraw dang lei chungchanga thil fel lo a awm leh awm loh chhui chian a remti a, May 19 khan order a tichhuak a ni.

MPCC tarlan danin, Covid-19 donaa hman tur PPE leh hmanraw dangte chu March 27, 2020-ah Lengpui Airport-ah Air India cargo plane hmanga phurh thlen a ni. Delhi aṭanga PPE leh bungraw dang lei nan Mizoram sorkar chuan Rs. 99,95,200 a hmang a, thlawhna hman man ringawt atan Disaster Management & Rehabilitation sum Rs. 16,23,000 hman a ni. PPE lei zingah hman tlak loh tam tak a awm tih  Covid-19 Medical Operational Team chairman Dr ZR Thiamsanga'n April 4, 2020-ah a lo tarlang tawh a ni.