Lokayukta din hun tur la chiang lo Sum hman tur a awm turah ngai

Mizorama Lokayukta din a nih hun tur hriat theih a la ni lo. Hetih lai hian, Law & Judicial department hotute chuan Lokayukta atan sumah harsatna a awm an rin loh thu Vanglaini an hrilh.

Vanglaini palai zawhna chhangin Law & Judicial hotute chuan, Lokayukta din a nih hun tur hriat theih a nih loh thu an sawi a, "Din a nih hun tura hun bituk a awm lo. Din a nih theihna atan a ṭul ang angin hma kan la ve reng a ni," an ti.

Hetih lai hian, Lokayukta-a chairman leh member tur thlangtu tur Search Committee member tur ruattu tur Selection Committee-a Gauhati High Court, Chief Justice aiawh tur chu tihdanglam a ni.

Selection Committee member atan hian Gauhati High Court judge T Vaiphei ruat a ni a, ani hi chief justice a nih leh tâk avangin a aiawh turin tun hnai khan judge Hrishikesh Roy ruat a ni.

Selection Committee-ah hian Mizoram Chief Minister chu chairman a ni a, member-te chu - Assembly Speaker, Opposition group leader leh Gauhati High Court Chief Justice emaw, a aiawh emawte an ni.

Zawhna chhangin Law & Judicial hotute chuan, Lokayukta atan pawisaah harsatna a awm an rin loh thu an sawi a, "Mamawhnaah chuan a awm turah ngaih a ni. State sorkar a inhawng reng," an ti.

Law & Judicial department hian Lokayukta din ṭan tirha thawktu tur department hrang hranga aṭanga pawhpên (deputation) phalna DP&AR-ah proposal an thehlut tawh a; Parliamentary Committee-ah Lokayukta din thuai a nih theihna atan lehkha an thehlut tawh bawk.

Law & Judicial hotute chuan, Lokayukta chu dik leh ṭha taka hna an thawh theihna atan thawktu tur pawh sorkar hnathawk lai ni lo, a thar lak tur a nih thu an sawi a, "Din
ṭan a nih chuan staff-ah harsatna a awm dawn avangin, sorkar hnathawk deputation-a lak hrih tum a ni," a ti.

Lokayukta din a nih ṭan tirhah office atan mi in luah tum a ni a, in zawn mek niin, duh ang in luah tur an la hmuh theih loh thu Vanglaini an hrilh.