2013 inthlana EVM-a vote tlate nawh reh a ni

Kum 2013 Assembly inthlanpuia MNF candidate-te'n electronic voting machine (EVM) chungchanga Gauhati High Court-a thubuai an thehluh chu High Court-in a hnawl hnuah, EVM-a vote tla zat inziak lut chu Election Commission of India thupek angin nimin khan nawh reh a ni.

ECI chuan thubuai hi Court-in a hnâwl tawh avang leh Court danga thubuai inchiah lai a awm tawh loh avangin, November 23, 2015 khan EVM-a data awmte chu nâwt reh tawh turin Aizawl District Election Officer a lo hriattir tawh a ni.

ECI-in phalna a pek angin nimin khan Aizawl DC Dr Franklin Laltinkhuma hoin Aizawl DC Election Office bula strong room chu hawn a ni a, EVM-te chu enfela dahṭhat nghal a ni.

Aizawl DC chuan, "Gauhati High Court thutlukna hi Supreme Court-ah appeal a nih hriat a ni lo a, chuvang chuan ECI thupek angin vawiin hian hawn a ni a, EVM-a thil chuang te, a tahrik leh hmingte pawh nuaibo vek remtih a ni," a ti.

Dr Franklin Lal-tin-khuma chuan, strong room hawn mek lai hian candidate-te vote hmuh dan pawh a ngai ngaiin a la awm vek thu sawiin, "Tracking software number zawng zawngte pawh endik nawn zawh vek tawh a ni," a ti.

EVM-te chu strong room aṭanga la chhuakin, a dahna tur siam pin-dan dang (primary warehouse)-ah dah luh nghal a ni. Strong romm hawnnaah hian political party tin aiawhte an tel.