Leimin vangin chhungkaw 10 inthiar chhuak

January 5, 2016 chawhnu lam khan Bungkawn High School Vengah in sakna tur lei laih vangin lei a min a, a chhak lamah lei a khik bawk avangin chhungkaw chhung-kaw 10 an riak chhuak a, in chhung bungruate an thiar chhuak bawk.

Thu dawn danin, Bungkawn, Nursery Veng - Maubawk kawng ân chhak lamah Lalthanzauvi Ngente, Royal Standard School neituin sikul building thar tur hmun a lai a, a bul chiahah RC Zonunsiama ten in sakna tur a lai bawk. In hmun tur laih inkarah hian vantlang step a awm.

In sakna tur laih nan hian JCB leh Excavator hmangin lei an laih nghawr bakah, January 4 zingah lìr a nghîn bawk avangin lei a min ta nia ngaih a ni.

In sakna tur chhak lam chu Thawhlehni chawhnu lamah a min ṭan a, a chhak lamah in panga vel huamin lei a khi bawk a; lei khîkna huam chhunga mite chu an inthiar chhuak nghal a ni.

Kawng chhak lama in pangaa chhungkaw parukte leh kawng thlang lama in pahniha chhungkaw palite'n bungrua an thiar chhuah bakah, an riak chhuak nghal a;
ṭhenkhat chu YMA Hall-ah an invawm lut a, ṭhenkhatin an laina hnaite an bèl thung. Kawng chhak lama lei minna hnaih bera awm Assam type in pahnih - Lalthanzauvi in leh Lalsiamliana in chu a ban thlang lam a inkhai tawh a ni.

Lei min leh khi hi Thawhlehni zan khan Home minister R Lalzirliana, Aizawl mayor PC Lalhmingthanga, bialtu councillor Zodingpuii, Aizawl DC Dr Franklin Laltinkhuma, Aizawl SP Lalhuliana Fanai leh Aizawl District Disaster Management Authority mite leh Disaater Management & Rehabilitation department mithiamte'n an thlawh a; State Disaster Response Force mite'n an riahchilh bawk.

Nimin zing khan DMR minister C Ngunlianchunga'n a tlawh a, parliamentary secretary KS Thanga leh bialtu MLA Vanlalzawma ten an tlawh bawk. DMR Minister ruahmnanna siam angin nimin chhun khan SDRF mite'n in ban inkhai tawh pahnih, Lalthanzauvi Ngente leh Vanlalrema inte chu an ṭhiat a ni.