High Court thupek sorkarin a khinglet

Gauhati High Court, Aizawl Bench-in Mizoram sorkara gazetted officer, kum nga thawk tawhte Mizoram Civil Service (MCS)-a an luh theih nan thla li chhungin MCS post pakua hnawhkhat tura Mizoram sorkar thu a pek chu Mizoram sorkarin Gauhati High Court Principal Bench-ah a khinglet.

Thu dawn danin, Gauhati High Court, Aizawl Bench hian August 2015 khan thupek chhuahin, Mizoram sorkar chu hriattir a pe a; Court thupekah hian Mizoram sorkar a lungawi loh avangin December 2015 khan Principal Bench-ah a appeal a ni. Sorkar khinletna hi January 2016 chhungin ngaihtuah a ni ang.

Taxation inspector pakhat chuan Mizoram sorkara gazetted officer, MCS-a lut theite luhtir lo a, direct recruitment-a MCS lak belh zel a ni si chu a dik lo nia hriain, April 2015 khan Mizoram sorkar chu Gauhati High Court-ah a khing a ni. High Court chuan June 4, 2015 khan Mizoram sorkar chu MCS officer tur la rih lo turin a hriattir a, chu thupek chu June 17, 2015-ah a sût leh a ni.

High Court chuan August 20, 2015-ah thutlukna siamin, Mizoram sorkara gazetted officer, kum nga thawk tawhte MCS-a an luh theih nan Mizoram sorkar chu thupek chhuah aṭanga thla li chhunga MCS post pakua hnawhkhat turin thu a pe a ni.