School Education officer-te ṭhukhawm

School Education department officer-te chu nimin khan an directorate conference hall-ah an ṭhukhawm a, School Education secretary P Lalchhuanga'n a hmanpui.

P Lalchhuanga chuan, sorkar hna-thawk tam takin an fate sorkar sikulah an luhtir lo chu sorkar sikulte ṭan lak a ṭulzia tichiangtu a nih thu a sawi a, "Hemi atan hian inenkawl dan ṭha a pawimawh hle a ni," a ti.

School Education Secretary chuan, India ramah Hindi thiam a pawimawh tawh em avangin tun aia Hindi thiam tura inzirtir uar a ṭul tawh thu sawiin, "Naupangin ṭawng tualléng an thiam theih nan a hman dan zirtir dan tur pawh ngaihtuah a ṭul tawh a ni," a ti a; CCE chu rualkhai zawka hman a ṭul thu leh DEO-te'n an bial ṭheuh an vil uluk a ṭul thu a sawi bawk.

Meeting-ah hian department hnathawh chi hrang hrang an sawiho a; director K Lalthawmmawia pawhin thu a sawi. Meeting-ah hian School Education directorate-a officer te, DEO leh SDEO te, RMSA leh SSA-a state leh district hotute an tel a ni.