Hlawh ringawt beisei loa thawk turin chah

AH&Vety minister C Ngunlianchunga chuan, sorkar hnathawkte'n hlawh ringawt beisei loin, thawh chhuah an tum ve tur a nih tih a sawi.

AH&Vety directorate-in nimina an office-a kum 2016 atana inhlanna hun an buatsaih a hmanpuinaah thu sawiin, C Ngunlianchunga chuan "Sorkar neitute hian thawk ve si lo a, sorkar sum ei ringawt a fuh lo. Hlawh beisei ringawt loin, kan thawk chhuak ve tur a ni," a ti a; sorkar hnathawkte chu thil tum pakhat tal nei turin a chah.

Minister chuan, mahni dinhmun ṭhat ringawt duh tur a ni lo tih sawiin, "Mipui tana kan hnathawh pawh a ṭha tur a ni a, kan thil tih hi mi hriat leh fak tlak a ni tur a ni," a ti.

Department hmasawnna leh hmingṭhatna tak tak chu department chhunga mite kutah a innghat thui hle tih sawiin C Ngunlianchunga chuan, "Politican-te chu nakin lawka kal chhuak leh mai tur kan ni," a ti a; sorkar hnathawkte chu an hnathawh vanga malsawmna an dawn tamzia hre reng chunga theihtawp chhuah turin fuih.

AH&Vety Minister chuan an department-in hma a sawn tih sawiin, "Kan department fakna tam tak ka dawng ve ṭhin. Fak kan nih chhan hi thawhhona a ṭhat vang a ni a, tumah inthlahdah loin, mi dang ring loin, mahni hmazawnah ṭheuh theihtawp i chhuah zel ang u," a ti.

Inhlan tharna hun hi AH&Vety director Dr Saihlira Sailo-in a kaihruai a, AH&Vety secretary K Lalnghinglova pawhin thu a sawi a ni.