RTI dilnaah pen hmangin a ziah theih

Mizoram Information Commission (MIC) hotute chuan RTI Act hmanga sorkar department-a information dil dawnin, lehkhapuanah pen hmanga ziakin dil theih a nih thu mipuiin hria se an duh an sawi a; chutih laiin, sorkar department/office zingah RTI dilna form hranpa a awm emaw tia lo ngen chíng an niin an sawi bawk.

MIC hotute chuan, mipuiin sorkar kalphung an hriat theihna atana dân siam RTI Act chu sorkar department-a thil diltu mi ṭhenkhat chuan an hre chiang tawk lo niin an sawi a; dân hriat chian loh vangin dilna thehluhah pawh sorkar office lam tana chhan ngaihna awm lote a awm niin an sawi.

Hetih lai hian, sorkar office
ṭhenkhata RTI Act khawihtu eng emaw zat chuan sorkar hmalakna leh hnathawh dan chungchang RTI Act hmanga zawttu mi ṭhenkhat chuan hun rei leh lutuka mi,
ṭangkaina nei tawh lo tura ngaih zawh luih an ching nia sawiin, anni tan chhàn a harsa ṭhin hle niin an sawi a; information diltute'n an dil hmain RTI dânte chu hre chiang hmasa ṭhin se an duh thu an sawi a ni.

RTI Act hmanga diltute hriat tur leh kaihhruaina bu, Right to Information Act 2005 Guidelines for Information Seekers/Applicants-in a tarlan dan chuan, "RTI Act 2005 hnuaiah information dilna form siam hranpa a ni lo a, lehkhapuan pangngai (plain paper)-in dilna hi theh luh theih a ni. Diltu hming leh postal address kim chang dilnaah chuan tihlan tur a ni," tih a ni.

Information chu English, Hindi leh awmna rama ṭawng tlânglawn ber hmangin a dil theih a ni a, ziakin emaw, electronic hmanraw hmangin thehluh theih a ni.

RTI Act hmanga dilna chu ni 30 chhungin chhanna pek tur a ni a, pek theih loh chi a nih chuan a chhan ziakin diltu hnenah hriattir tur a ni. Hemi chungchangah hian, diltu mi ṭhenkhat chuan, sorkar office ṭhenkhatin ni 30 nghah thlen kher an chíng nia an hriat thu leh, ni 30 nghak thleng kher loin a hma thei ang berin pek chhuah tum se an duh thu an sawi.

MIC hotute chuan, RTI Act hmanga information dil turte chu form an thehluhnaah receipt la ngei turin an chah a, eng emaw buai a awm palhin receipt chu mahni invenna tur leh finfiahna ṭangkai ber pakhat a nih thu an sawi.