Sittwe-Paletwa siam zo dawn hnai Paletwa-Zorinpui atan tender chhuah

Mizoram Assembly-a Estimates Committee hotute chuan, Kaladan Multi Modal Transit Transport Project (KMMTTP)-a Sittwe leh Paletwa-a lawng chawlhhmun siam mek leh Sittwe leh Paletwa inkara lawng kawng chu March 31, 2016-ah siam zawh tum a nih thu an sawi a, Paletwa leh ramri (Zorinpui) inkar kawng laih turah tender chhuah mek a nih thu an sawi.

Estimates Committee-te hian November 30 - December 9, 2015 chhunga Myanmar-a KMMTTP an tlawh chungchangah nimin khan Assembly conference room-ah thuthar thehdarhtute an kawm a; an chairman Lalrinliana Sailo chuan, KMMTTP chu a taka a puitlin an nghahhlelh thu leh Mizoram hmasawnna tur pawimawh tak a nih thu sawiin, "He project hi peih ila chuan kan ram economy chu sang takah a chho ang," a ti.

Lalrinliana Sailo sawi danin, KMMTTP-ah hian India sorkara Ministry of External Affairs (MEA) hnuaiah Myan-mar ram chhungah Essar Pro-jects India Ltd.-in lui kuang siam rem leh Sittwe leh Palet-wa-a lawng chawlhhmun siam hna an thawk a; sum ruahman zat chu vbc. 342 a ni.

Myanmar sorkara Working Committee of KMMTTP-in an enpui a, Project Development Consultant chu Inland Water-ways Authority of India niin, Project Supervision Consultant chu URS Scott Wilson India a ni. September 20, 2010-ah hna thawh ṭan a ni a, June 26, 2013-a zawh tura tih ni mah se, tun thlengin an la zo lo a, March 31, 2016-ah chuan zawh vek hman an tum thu, Essar hotute chuan Estimates Committte-te an lo hrilh.

Kolkata lawng chawlhhmun aṭanga Sittwe inkar chu Bay of Bengal tuipuiah km. 539 a ni a, Sittwe aṭanga Paletwa inkara Kaladan (Chhimtuipui lui kal zel) luia lawng kawng chu km. 158 niin, Paletwa aṭanga Zorinpui inkarah motor kawngpui siam tur niin, km. 110-a thui a ni. Kolkata aṭanga Zorinpui inkara lawng leh motor kawng chu km. 807 a ni ang. Hetih lai hian, motor kawng-puia Kolkata leh Aizawl inkar hlat zawng chu km. 1,487 a ni.

Paletwa-Zorinpui inkarah motor kawngpui sial tur a ni a, kawng siamtu tur thlan nan tender chhuah mek niin, contractor tur thlan a la ni lo. KMMTTP hnuaiah hian lawng, ton 300 ṭheuh phur thei tur paruk siam mek a ni bawk.

Myanmar ram chhunga KMMTTP hna thawhnaah hian Yangon, Sittwe leh Paletwa-ah Myanmar mi 163 leh India mi 64-in hna an thawk mek a; an zingah Mizoram Mizo an awm loh thu, Lalrinliana Sailo chuan a sawi.

Estimates Committee Chair-man chuan, KMMTTP hnuaia Mizoram chhung, Lawngtlai leh Zorinpui inkara kawngpui sial mekah, zangnadawmna phûttu an tam tih sawiin, "Mizoram pumpui zau zawng sq.km. 21081 a nih laiin, zangnadawmna phûtna ram zau zawng chu sq.km. 25,940.05 a ni a, Mizoram pumpui aiin a zau zawk a ni," a ti a; mahse, zangnadawmna an phûtna ram zau zawng chu a thlahniam dawn nia an hriat thu a sawi.

Estimates Committee mem-ber Vanlalzawma chuan, KMMTTP atan India leh Myanmar sorkarte'n April 2, 2008-ah New Delhi-ah thuthlung an ziah thu sawiin, "Project hi a hlawhtlin chuan Cachar-a kawng dan kan hlau tawh lo ang," a ti a; Myanmar ramah tuna rorelna chelh mektute'n tun hnaia inthlana chak ta NLD hnenah thuneihna an hlan ngei a rinawm thu a sawi.

Member dang Vanlalawmpuii Chawngthu chuan, KMMTTP chu a hlawhtlin chuan Mizoramin ei leh bara a hlawkpui dawn mai bakah, Zofate insuihkhawmna turah kawng a inhawn zau phah sawt dawn tih a sawi a, "A phûr-awm em em a, missionary tirh chhuahna thlengin a awlsam phah dawn a ni," a ti.