Scholarship atan vbc. 49.27 pe chhuak

Ministry of Tribal Affairs website-a tarlan danin, kum 2015-16 chhunga Mizorama Post Matric Tribal Scholarship atan December 31, 2015 khan cheng vbc. 49.27 pek chhuah a ni.

Ministry of Tribal Affairs website-a tarlan dan chuan, Mizorama Scheduled Tribe-te tana Post Matric Scholarship (PMS) atan sorkar laipuiin a tum tur chu December 31, 2015 khan pek chhuah a ni a, chu chu kum 2015-16 a PMS atana final instalment a ni.

PMS scholarship atana ruahman hi cheng vbc. 50.05 ni mah se, nikum lama sum hman loh cheng nuai 77.97 nen siam remin, cheng vbc. 49.27 pek chhuah a ni.

Sum hi pek chhuah aṭanga thla khat chhungin state sorkarin a buaipui turte hnenah an thlen ngei tur a ni a, a dawng turte hnenah pek a ni ngei tih state sorkarin sorkar laipuiah a hriattir ngei tur a ni bawk. PMS sum hi hmun danga pawhpên phal a ni lo a, hman bâng a awm chuan sorkar laipuiah an pe kîr tur a ni.

Hetih lai hian, Higher & Technical Education department hotute chuan, January 4, 2016 khan Post Matric Tribal Scholarship leh Pre Matric Minorities Scholarship tur an la dawn loh thu an sawi a, "State dang pawhin scholarship tur sum an la dawng lo. Dawn a nih hun tur pawh hriat theih a ni lo a, sorkar kum chhung ngeia dawn hman beisei a ni," an ti thung.