Thingtlang hmasawnna tura ruahmanna sawiho

Thingtlang hmasawnna tur atana sorkar laipui duan, Shyama Prasad Mukherji Rurban Mission (SPMRM) chungchang sawihoin, Nilaini khan Secretariat conference hall-ah chief secretary Lalmalsawma hoin sorkar mi pawimawhte an ṭhukhawm.

Sorkar thuchhuah tarlan danin, SPMRM thar hmang hian thingtlang khaw inhnaihte chu hlawm khatah siamin, changtlung thei ang bera chei ṭhat tum a ni a; sorkar laipuiin thingtlang khuate tihhmasawnna atana hmalakna Provision of Urban Amenities to Rural Areas (PURA) a kalpui tawh aṭanga a ṭha lai la chhuakin, SPMRM hi a siam a ni.

Mission kalpui a nih chhungin India ram pumah cluster 300 thlan chhuah tur a ni a, a thawh khatnaah cluster 100 thlan phawt a ni ang. State tin aṭangin cluster village thlangin, chung zinga village pakhat chu growth centre atan hman a ni ang a; growth centre chhehvela khaw inhnaihte chu he hmalakna thar hnuaiah hian rîn luh a ni ang.

Cluster village leh growth centre thlang chhuak tur hian Ministry of Rural Development chuan tehfung chi hrang hrang a siam a, tehfung aṭanga teha tling te, hma sawn zel tura theihna nei nia langte chu SPMRM-a telh turin state sorkarin sorkar laipuiah rawtna a thehlut ang. Rawtna chuJanuary 10, 2016 ral hma ngeia thehluh tur a ni.

State Level Empowered Committee chuan growth centre atana thlan chhuah zingah Aibawk chu ngaih pawimawh bera dahin, Thingsulthliah leh East Lungdar ten an dawt a ni.

Meeting-ah hian Finance, Planning, PWD, Health & Family Welfare, PHE, FCSCA, Environment & Forests, Soil & Water Conservation, School Education, ICT, Horticulture, UD&PA, Agriculture, Social Welfare, LAD, Power & Electricity, Rural Development, SIRD, State Planning Board leh MzSRLM hotute an tel.