KHAWTHLIR

Republic Day

Nimin khan Serchhip DC Dr Lalrozama hoin DC meeting room-ah kumina Serchhip Republic Day hman dan tur an sawiho. Ruahman dan chuan, Republic Day hi Khawtetlang khelmualah hman a ni ang. He ni pual hian home hrang hrangah thilpek hlan tum a ni.

AIR inhlan thar

All India Radio, Aizawl Station chuan nimin khan Tuikhuahtlanga an office-ah director DR Lalropuia hoin kum 2016 atan thawktute inhlan tharna an hmang. He hunah hian kum kal ta chhunga harsatna an tawh leh an hmachhawp hrang hrangte an sawiho nghal a ni.

Tamil Nadu-ah Mizo hnam lâm

MZP Cultural Club chuan South Zone Cultural Centre huaihawta January 9-17, 2016 chhunga Thanjavur, Tamil Nadu-a Salangai Naam Festival neih turah hnam lâm an entir dawn a, MZP Cultural Club member mi 15-te chuan January 5 khan Aizawl chhuansanin Tamil Nadu an pan.

Heroin man

Champhaia Excise & Narcotics department chuan Nilaini zan dar 6 vel khan Zokhawthar kawngah heroin gram 8 an man a, a neitua puh Vanliana (26) s/o Tleineihsanga, Khawmawi, Myanmar nia inchhál an man bawk.

DC-in kâwm

Kolasib DC H Lalengmawia chuan nimin khan Bairabi SDC office-ah Railways hotute a kâwm. He hunah hian Bairabi Rail Station bula an building leh mimal building la awm, ṭhiah tura tih a nih hnua hun eng emaw chen
ṭhiah loha awmte ṭhiah dan tur sawiho a ni a, an inkawm zawhah in awm dante an enfiah nghal a ni.

Office hawng

Lawngtlai-a Lairam Isua Krista Baptist Kohhran (LIKBK) Assembly office chu nimin aṭang khan kum 2016 atan hawn ṭan a ni a, office hawn rual hian thawktute chu Pathian hnenah an inhlan thar.