CM hoin MP leh MLA-te'n SAGY leh SBM an sawiho

Nimin khan chief minister Lal Thanhawla hoin Secretariat conference hall-ah Sansad Aadarsh Gram Yojana (SAGY) leh Swachh Bharat Mission (SBM) chungchang sawiho a ni a, Mizoram MP leh MLA-te an tel.

Chief Minister chuan, SAGY hnuaia model village siam chungchanga a pawimawh hmaasa ber chu baseline survey neih a nih thu a sawi a, "Khawtlang mamawh berte thlan thiam a pawimawh hle dawn. Mipuite inhnamhnawihtir a, mipuite nen thawhho tur a ni," a ti.

Model village atan a hranpaa sum dah a nih loh avangin hmasawnna hna kal lai aṭanga rua-hmanna siam tur a nih thu a sawin Lal Thanhawla chuan, "Hna kalpuinaah hnatlanga hna thawhna tur chi tam tak a awm thei dawn a ni," a ti a; SAGY-in a tum ber chu kawng engkima huapzo hmasawnna thlentir a nih thu a sawi.

Chief Minister sawi danin, model village hi kum 2019-ah chuan a intahtawlin khaw pathum thlan tur a ni a; kumin 2016 hian a kaihhruai-nain a phût angin model village hmasa bera thlan chu peihfel hman tur a ni.

Swachh Bharat Mission chungchangah CM Lal Thanhawla chuan, "India ram hmun dang-te nen khaikhin chuan Mizoram chu a ṭha viau a. Inthiarna in nei lo tam tak an awm avangin local body inthlana ding turte chuan mahni inah inthiarna hmun nei vek tura tih an ni," a ti.

Meeting-ah hian PHE, Rural Development leh UD&PA department-ten a lem nen inkaihhruaina leh hmalak turte an sawifiah a; MP leh MLA-te'n hriat chian leh hriat belh duh an neihte an zawt a, an sawiho a ni.