Minister-in Tuipuiral Annual Meet hawng

Nimin khan Bungzung khaw khelmualah Tuipuiral Annual Meet vawi 43-na ṭan a ni a, Sports & Youth Services minister Zodintluanga'n a hawng. Minister chuan, hlawhtling turin âtchilh neih a ngaih thu a sawi.

Zodintluanga chuan, tunlai khawvel-ah eng kawngah pawh hlawhtling turin tumruhna, taimakna leh âtchilh neih a ngaih thu sawiin, "Football-ah pawh naupan lai aṭanga âtchilh tlat chuan khawvel hriat a nih theih a, zirna lamah pawh âtchilh tlattu chuan hlawhtlinna a hmu ṭhin," a ti.

Football-ah Mizo ṭhalai ṭhenkhatte India ram team ṭha ber berah an feh-chhuah thu sawiin, Zodintluanga chuan, "Hetiang thleng tur hian sorkarin infiamna hmunhma ṭha a pe a, ṭhalaite hian theihtawpa kan beih ve a ngai a ni," a ti bawk.

Bialtu MLA leh Mizoram Youth Commission chairman T Sangkunga pawhin thu sawiin, "Kum hnih chhung chauhin ṭhalai tam tak India ram khawpuia hna thawk turin an liam a, tunah chuan Aizawlah Civil Service coaching centre din a ni leh dawn ta a ni," a ti.

Tuipuiral Annual Meet hi kum 1974 aṭangin kum tin neih a ni a, kuminah hian Tuipuirala khaw 25 aṭangin football-ah team 18 leh volleyball-ah team 15 an tel a ni.