MZP-in Reang Development Area an duh lo

MZP chuan thu-chhuah siamin, January 5, 2016-a NLUP Conference Hall-a NITI Aayog hnuaia hmarchhak state-te tana 6th. Schedule area-te tana sum hai chhuah dan sawihonaa 'Reang Development Area' chungchang a lang chu ngaihṭhatthlak loh an tih thu an tarlang.

MZP chuan, sorkar thuchhuahin January 6-ah 'Reang Development Area' tih chu sawifiahin, ‘Mamit district chhunga hmun kilkhâwr zawkte hmasawnna tur a ni' ati niin an sawi a, "He thil hi MZP chuan ngaihṭhatthlak loh hlein a hria a, Tuikukte chungchanga Mizoram sorkar hmalak dan uluk takin kan ngaichâng reng dawn a ni," an ti.

MZP chuan, mahni duhthu ngeia Mizoram chhuahsan a, Mizorama lêt tura Mizo mipuiin vawi tam tak an koh laia Tripura-a awm tlatte chungchangah Mizo mipui leh political party zawng zawng ṭangrual veka hmalak mek a nih laia, sorkar hotu lian
ṭhukhawmin Bru-te hmasawnna tur bik nia ngaih theih an puangzar niin an sawi a, "Min barakhaih a. Mipui an phun nasa tih an hriat avanga corrigendum siam leh ngawt hi hriatthiam harsa kan ti," an ti.

MZP tarlan danin, Bru-te'n autonomous district council an dil tawh a, Mizo mipuiin nasa taka an dodal avangin pek an ni lo a, chumi hnuah Bru Development Council an ngiat leh a, Mizo mipuite'n an duh loh vang bawkin tihhlawhtlin a ni lo.

Bru-te tana ‘Reang Development Area’ siam a, an pual bika development area siam chu Mizo mipuite'n engtikah mah an phal ngai dawn loh thu leh, siam tumna a awm a nih chuan na taka an dodal zel dawn
thu, MZP-te chuan an puang a ni.