2014 aiin 2015-ah boruak a blawhhlawh zawk

Kum 2015 thlah leh kum 2016 lawm lai vel khan December 31, 2014 zan aiin Aizawl khawpui boruak a bawlhhlawh zawk a, ri bengchheng a tam zawk bawk.

Mizoram Pollution Control Board chuan, kum hlui thlah leh kum thar lawm zanah boruak bawlhlawh dan Aizawl, Lengpui, Lunglei, Champhai leh Kolasib-ah an teh ṭhin a; December 31, 2015 zan khan Aizawlah chuan Bawngkawn, Laipuitlang, Dawrpui leh Khatla-ahte a tehna khawl dahin, Lengpui, Lunglei, Champhai leh Kolasib-ahte an dah bawk.

Tehna khawla a lan danin, boruak bawlhlawh, mihring hìp luh tham leka tê, Sulphur Dioxide leh Nitrogen Dioxide chu December 31, 2014 zanah teh tham mang loh a awm laiin, December 31, 2015 zanah chuan mihring tana him chin bituk zat, national standard aiin a sang zawk a, a tehnaah 112 a tling pha a ni.

Lengpui, Lunglei, Champhai leh Kolasib-ah pawh kum 2014 aiin 2015 kum tawpah boruak bawlhhlawh a pung a, mahse, hlauhawm khawpin a pung lo.

MPCB hotute chuan, boruak bawlhlawh pung chu ngaihṭhat lohna tham a tling tih sawiin, hîp luh tawh chuan chuap kár vêlah a tàn ṭhin avângin chuap kaihhnawih natna chi hrang hrang a thlen thei niin an sawi.

MPCB chuan, kumhlui thlah leh kumthar lawm chhung khan Aizawl khawpuia ri bengchhen dan pawh an teh a; chawhrualin kum 2014 aiin 2015-ah bengchheng a nasa zawk. Kum 2014-ah a rin ber laiin a tehnaah decibel 70.56 a ni a, kum 2015-ah chuan decibel 78.5 a ni.