DoNER Minister-in Airport chei ṭhat October 2023 ral hmaa zo turin a hrilh

Ministry of Development of North Eastern Region (DoNER) minister of state BL Verma chuan Lengpui Airport tihchangtlunna hna thawh mek chu kumin October ral hmaa zawh a duh thu leh chutiang tur chuan ṭan la turin Mizoram sorkara hotute thu a chah.

BL Verma hian September 16, Inrinni khan Lengpui Airport a thleng a, Mizoram sorkar hotute nen Lengpui Airport VIP Lounge-a an an inkâwm. NESIDS sum hmanga Lengpui Airport tihchangtun hna thawh mek a enfiah nghal a, hnathawh chu October 2023 ral hmaa zawh ni se a duh thu a sawi.

DoNER Minister hian Lengpui Airport tihchangtlunna hna hrang hrang - elevated road, departure lounge, baggage make-up area leh hmun dangte a fang kual a; April 11, 2023-a Lengpui Airport a tlawh ṭumin October 2023 chhunga Airport chei ṭhat hna thawk zo turin Mizoram sorkar hotute a lo hrilh tawh bawk.

Lengpui Airport tihchangtlun hna hi December 4, 2023-a zawh turin hun pawhsei a ni a; Mizoram PWD leh GAD (Aviation Wing) hotute chuan, Airport tihchangtlunna hna dang, SASCI sum hmanga thawh mek nen a kal kawp avang leh, a bik takin electric lam hna chu duh anga chaka thawh leh hmalak a har thu DoNER Minister an lo hrilh a ni.

DoNER Minister hi Lengpui Airport-ah GAD secretary K Lalthawmmawia, Planning & Programme Implementation secretary Lalmalsawma Pachuau, Aviation Wing principal consultant Wg.Cdr. J Lalhmingliana leh PWD, GAD leh Planning hotu dangte'n an lo dawngsang.

Sorkar thuchhuah tarlan danin, Lengpui Airport tihchangtlun hna hi NESIDS sum nuai 1,959 hmanga thawh a ni a, civil works 88% leh electrical works 68.31% thawh zawh tawh a ni.