Ram, hnam, sakhua humhim turin tualṭo party an rintlak loh - Lalsawta

Mizoram Pradesh Congress Committee (MPCC) president Lalsawta chuan, sorkar laipuia BJP-in thuneihna an chan chinah sakhaw zalennaah harsatna a thleng ṭan nia sawiin, missionary-te leh kohhran lute an chêp ṭan niin a sawi a; ram, hnam leh sakhua humhim turin tualṭo party-te an rintlak loh niin a sawi bawk.

Lalsawta hian September 16, Inrinni khan Falkawn khuaa lawm luhna inkhawmah thu sawiin, "Kum 2014 aṭanga Central-a BJP a rawn sorkar chinah sakhaw zalenna chungchangah harsatna kan tâwk ṭan a, kan missionary leh kan kohhran lúte an chêp tak tak ṭan ta. Kan ramah ngei hian Hindu lal ram din tumin, kum tam tak hnuah he ramah hian Kristian an awm ve ṭhin tih tur dinhmunah min siam an tum a ni," a ti.

MPCC President chuan, "Kan ram, kan hnam leh kan sakhua humhim turin tualṭo party, regional party-te an rintlak loh. Kristiante leh hnam tlem zawkte nuai chimih tumtu BJP hi Mizorama regional rarty-te hian do duh mahse an thei lo. CAB pawh kan do ti chungin House-ah an support thu an sawi leh mai," a ti a; Congress erawh chu national party, sakhaw zalenna champion puitu leh champion pui reng tur an nih thu a sawi.

BJP chu an duh tihhlawhtlin an tumnaa zah leh pawisak nei loah puhin Lalsawta chuan, "Pathian ram zauhna tura kan thawhlawm chungchangah pawh kan thu ta lo hle. J&K pawh union territory pawh ni phak loin a rapbet hmiah. Hetiang pawisak nei lo BJP leh a thawhpuite kuta ram hruai hna hlan hi a theih loh. Kan ram, kan hnam leh kan sakhua humhim turin kohhran, NGO leh party dangte ṭan ho a ngai tak zet a ni," a ti.

Inkhawmah hian Aizawl South-III biala Congress party candidate tur Rosiamngheta pawhin thu a sawi a ni.