Thawhrimna hmanga ram siam kan tum - K Sapdanga

ZPM working president K Sapdanga chuan inthlan nghakhlel berte chu party worker-te ni loin ṭhalaite leh sorkar hnathawkte an nih thu leh, ZPM-in thawhrimna hmanga ram siam an tum thu a sawi.

K Sapdanga hian September 16, Inrinni khan Tuichang biala Sialhawk, Khawhai, Chawngtlai, Tualte leh Khawzawlte a tlawhnaah thu a sawi a; ZPM party chu an thawk rim em em a, hmun tinah an mite an phûr nia sawiin, "ZPM hian thawhrimna hmanga ram siam kan tum," a ti.

Inthlan dawnah party worker-te'n inthlan an châk ṭhin a, a phûr ber ber an nih ṭhin thu sawiin Sapdanga chuan, "Tunah chuan inthlan nghakhlel berte chu party worker-te ni loin, mi dang an ni ta a, pakhatnaah chuan sorkar hnathawkte an ni. Sorkar hnathawkte'n sorkar thar hmél hmuh an châk a, inthlan an nghâkhlel em em a ni," a ti. MNF sorkarah sorkar hnathawkte'n a hun takah hlawh an lâk theih loh thu te, an duh hunah GPF an lak theih loh thu te, pension hlawhah harsatna a thlen thute a sawi.

ZPM Working President chuan ṭhalaite'n inthlan leh sorkar thar an nghakhlel tih sawiin, "ZPM hian ṭhalai hna hmu lote tan a tam thei ang ber hna siam kan tum a, hand holding policy kan nei. Ṭhalaite beiseina tihhlawhtlin hi ZPM din chhan zinga pakhat a ni a, lehkhathiam chauh ni loin, lehkhathiam lote pawh bána kaih hmangin kan khai chhuak dawn a ni," a ti.