Zo hnahthlak rawn lutte sorkarin rilṭáma an awm a phal lo - Tawnluia

Deputy chief minister Tawnluia chuan, Mizoram ṭhenawm ram aṭanga Zo hnahthlak rawn lutte chu Mizoram sorkarin rilṭáma an awm a phal lo a, chhawmdawl hna theihtawpa chhuah a nih thu a sawi.

Tawnluia hian YMA, Khawzawl Zaingen Branch-in September 16, Inrinnia an din champha kum 75-na an lawm a hmanpuinaah thu sawiin, "Zo hnahthlak unau ṭhenawm ram aṭanga lo lutte hi sorkarin rilṭáma an awm a phal lo a, theihtawp a chhuah zel a ni. Zo hnahthlakte inpumkhatna leh inunauna tura YMA hnathawh hi a ropui hle," a ti.

YMA chu pawl lian tak, ṭhalaite fuan khawmna, Mizo hnam chawi sánga hnam thinlung, nunphung leh ziarángte venghimtu a nih thu sawiin Tawnluia chuan, Mizo hnam chhanchhuahna, humhimna leh chawisan kawngah theihtawp chhuah ṭheuh tura kal khawmte a sáwm a; Mizo nun ze mawi - tlawmngaihna, aia upa zah, ṭhenawm khaw-vengte ngaihtuahna leh inhmangaihna ropui takte vawng nung zel turin a chah.

Khawzawl Zaingen Branch YMA hi September 16, 1948-ah Zaingen khua Thalthlithaw Veng Primary School-ah din a ni a, member 447 an awm mek a ni.