KHAWTHLIR

Larsap leh CM kâwm

DoNER minister of state BL Verma chuan September 16, Inrinni khan Governor Dr Hari Babu Kambhampati leh chief minister Zoramthanga te an chenna hmunah a kâwm a; Mizorama DoNER Ministry kaltlanga hmasawnna hna thawh mek te, hmachhawp la awmte leh ṭul dangte a sawipui a ni.

ITI-in zirlai thlah

Industrial Training Institute (ITI), Aizawl chuan September 15, 2023 khan an zirlai, an zir tur zir zote thlahna hun an hmang a, LESDE secretary Lalramsanga Sailo-in a hmanpui. ITI, Aizawlah kumin (2023-24) hian zirlai 419 an awm a; result chhuak hnuhnung berah a pumpuia an pass percentage chu 98.2 % niin, a din tirh aṭanga result ṭhat ber ṭum a ni.

E.Roll siam rem

Mizoram Assembly inthlanpui neih tura Hnahthial district electoral registration officer Neng Thianlala, SDO (Sadar) chuan September 16, Inrinni khan Hnahthial khawpuia polling station hrang hrang tan Electoral Roll Hearing of Claims & Objections a buatsaih a; electoral roll-a inziak lut tawh document felfai lo te, polling station insawn duhte tan insiamremna hun hman a ni. Hnahthial khawpuiah hian polling station paruk a awm a, voter 5,830 awmin, mipa 2,831 leh hmeichhia 2,999 an ni.

Minister-in enfiah

Health minister Dr R Lalthangliana chuan September 16, Inrinni khan Cherhlun PHC leh Thingsai PHC a tlawh a, hospital dinhmun leh X-Ray khawl dahna hmun turte a enfiah. Damdawi-in pahnihah hian poor fund atan Rs. 10,000 ve ve a hlan.

Senior inkhawmpui

Mizoram Presbyterian Kohhrana Senior department chuan nimin khan pastor bial hrang hrangah inkhawmpui an hmang. Inkhawmpui hi bial tam zawkah chuan nimin khan nilengin hman a ni a, bial ṭhenkhatah chuan Inrinni zan aṭanga nizan thleng khan hman a ni. Report-a a lan danin, MSSU hnuaia Senior department-ah zirtirtu 5,136 leh zirlai 31,344 an awm.