PM Vishwakarma Scheme hawn a ni
Mahni kutkawih leh hmanraw neih angte hmang ṭangkaia kutthemthiamna neite chhawmdawlna tur ruahman thar, PM Vishwakarma Scheme chu nimin khan India ram pumah hawn a ni a, Mizoramah pawh Vanapa Hall-ah a hawnna hun hman niin, DoNER minister of state BL Verma khuallian a ni.
PM Vishwakarma Scheme hi Vishwakarma Jayanti leh Prime Minister pian champha vawi 73-na pualin India rama hmun 70 chuangah hawn a ni a; Vanapa Hall-a hawnna hunah hian minister Lalruatkima khualzahawm niin, sorkar official-te leh kutthemthiamnaa eizawngte an tel.
BL Verma chuan, kutthemthiam, thiam thil hrang hrang neite chu ram tana lang lo lama thawh hlawk tak an nih thu a sawi a; PM Vishwakarma Scheme kalpuina atan sorkar laipuiin cheng vbc. 13,000 a ruahman thu leh ministry pathumin an kalpui dawn thu sawiin, "Hamṭhatna dawngtute chu sum leh paia ṭanpuina pek, training & stipend pek, hmanraw leina tur Rs 15,000 thleng pek, an thil deh chhuahte hralhna ngaihtuahsak kalpui a ni dawn. Dahkham ngai loin loan pung tlem Rs 3,00,000 thleng a lak theih dawn," a ti.
PM Vishwakarma hnuaiah mahni kutkawiha thil siam chhuah tihchangtlun leh zawrh chhuah thlengin puih theih a ni dawn tih sawiin BL Verma chuan, "Thiamthil hrang hrang siamna trade 18-ah bul ṭan a ni dawn a, thingtlang leh khawpui tuam chhuah vek tum a ni," a ti a; hna thawhna bungrua leh hmanraw changkang zawk pek an nih dawn thu a sawi.
DoNER Minister chuan, kum 10 kal ta chhungin North Eastern Council kaltlangin Mizoramah project 103, cheng vaibelchhe 554.19 hû pek (sanction) a nih thu a sawi bawk.
PM Vishwakarma Scheme hawnnaah hian minister Lalruatkima, chief secretary Dr Renu Sharma, Planning secretary Lalmalsawma Pachuau, Commerce & Industries secretary R Lalramnghaka leh DoNER joint secretary Angshuman Dey te pawhin thu an sawi.
PM Vishwakarma hmang hian mahni kutkawih leh hmanraw neih angte ṭangkai taka hmanga kutthemthiamna hrang hrang neite chhawmdawl a ni dawn a, bul ṭan nan cheng vbc. 13,000 ruahman niin, traditional trade 18-ah kalpui a ni dawn. Hamṭhatna dawng theite chu PM Vishwakarma portal-ah biometric hmanga inziah luh theih a ni.