Police kut aṭanga tlânbo Jail táng man leh a la ni lo

Siaha District Jail aṭanga a tlan chhuah hnuah Central Jail, Aizawla man Vanrampana (24), Meisatla, Siaha chu police kut aṭangin a tlânbo leh a, nimin tlai thleng khan man a la ni lo.

Vanrampana hi September 9, 2023 khan Siaha District Jail aṭangin a tlân chhuak a, September 15, 2023 khan Central Jail-a táng a ṭhianpa kan a tum laiin duty-te'n ringhlelin, táng tlânbo a ni tih finfiah a nih hnuah man a ni.

Central Jail aṭang hian lock up-a dah turin Zonuam Police Out Post-a duty-te'n an la a, Out Post thlen hnuah lirthei aṭanga a chhuk pahin a tlan chhuak a ni.

Vanrampana hi rûkrûk vanga man a ni a, court-in a chungthu a ngaihtuah lai a ni. Siaha District Jail-a security wall siam mek aṭangin a tlan chhuak a, a tlan chhuak tur hi jail-a duty-te'n dan tum mahse an dang hneh lo nia thu dawn a ni.