ZPM-in street campaign an buatsaih

ZPM party chuan September 16, Inrinni khan Armed Veng South Bazar bulah leh Bethlehem Vengthlang Taxi Stand-ah Street Campaign an buatsaih a, party hruaitute leh inthlana an candidate turte'n thu an sawi.

Armed Veng South-a inkhawmah ZPM PAC member Vanlalneiha Ralte chuan, sorkar ding tawhte'n ram tana thil ṭha tam tak an tih tawhte chhunzawm tur leh kalphung thar sorkar din turin an inbuatsaih mek tih a sawi a, "Sem policy hi tihtawp kan tum a, bana kaih policy hmangin thlak kan tum. Ṭhalaite tana belh tlak, Zoram khawvel ṭha zawk siam turin kan inbuatsaih mek... Kalphung thar kan tih hi kalphung ṭha zawk a ni," a ti.

Aizawl West-II biala ZPM candidate tur Lalnghinglova Hmar chuan, pawisa chu a sema sem tur ni loin, thawh chhuah tur nia a lan thu sawiin, "In tina sema inkhaichhuah tum ang chi hi a fuh lo niin a lang a, hmasawnna tak tak min thlen zo lo," a ti a; inthlanah ṭhahnemngai taka vote thlak turin Mizo mipui a sáwm.

Lalnghinglova Hmar chuan, harsa chung chunga English medium-a sum tam tak sèn ngai chu tihreh a ṭul thu sawiin, "Sorkar sikul chawi kâng thei sorkar ni turin ZPM kan inbuatsaih dawn. Mahni bial chhungah ṭheuh zirna chawi kâng turin ZPM candidate-te kan inbuatsaih mek a, quality education siam turin ke kan pên dawn a ni," a ti.