MPCC-in street campaign an buatsaih

Congress party chuan September 16, Inrinni khan Champhai Zotlangah Street Campaign an buatsaih a, MPCC thupuangtu Dr Lallianchhunga, Champhai South biala INC candidate tur ni bawkin thu sawiin, sum leh pai hmachhuana politics khel ṭhinte mipuiin an hnâwl a ṭul thu a sawi.

Dr Lallianchhunga chuan, politics khelh danah sum leh pai a lansarh thu sawiin, "Mipui kan fimkhur a ngai. Damlo enna atana cheng sing tél thlauh sawi tur an awm. Sum leh pai hmachhuana politics khel ṭhinte hi mipuite'n kan hnawl ngam a ngai a, heng mite hi kan hnâwl tih kan lantir thuai loh chuan Mizoram hi mi hausate chauh rorelna ramah a chang thuai thei a ni," a ti.

MPCC thupuangtu chuan, "Mizoram political party zingah BJP thawhpui mektu leh BJP sum leh pai beiseitu an awm leh ṭhin hi kan hnam tan a la pawi dawn hle. BJP phênah hian India ram Hindu lal rama siam tumtute'n thiam takin Kristian leh sakhaw tê zawkte min nék chêp mek," a ti a; Mizorama political party zingah BJP thawhpui lo tur chiang sa chu Congress party chiah an niin a sawi.