Vantlang hmuna zu rûi an chet chhan dan leh thupek vang a ni - CLP Leader

Congress Legislature Party (CLP) leader Zodintluanga Ralte chuan, Mizoramah puipunna hmuna zak map loa chê zu rûi an awm ṭhin chhan chu Mizo society-in a pawm vanga a ngaih ve loh thu a sawi a, "Dan leh thupek kenkawhna a hlawhchham vang zawkah ka ngai," a ti.

CLP Leader hian thuchhuah siamin, ZPM leader Lalduhoma'n, 'Mizoram anga vantlang puipunnaa zak miah loa zu rûi an chetna hi khawvelah a váng khawp ang. Society-in kan pawm vang, society-in kan dem nat tâwk loh vang' tia sawi chungchanga a ngaihdan a tarlang a ni.

Congress sorkar laia dan hnuaia zu zawrh ṭan tirh lamah zu rûi hmuh tur an tam thu sawiin Zodintluanga chuan, "Dan ṭha taka kenkawh a ni a, zu ruih vanga mante chu vantlang hnate thawhtir an ni. Hun a kal deuh hnu chuan khawlai chu sawi loh, puipunna hmunah zu rûi hmuh tur an awm meuh tawh lo," a ti.

CLP Leader chuan, Mizo khawtlang nun a ṭha hle nia sawiin, "Puipunna hmuna zu rûi hau chiam duh khawpa mi dang hnawk ti tam lohna society kan ni," a ti a; buaina an siam a, mi dang tana hnawksak taka an che a nih loh chuan Mizo khawtlang nunah mi, zu a ruih vanga ngawta hmusit taka hau an tam lo niin a sawi.

Vantlang hmuna zu ruih a thlàwp loh thu a sawi rualin Zodintluanga chuan, "ZPM Leader sawi anga vantlang hmuna zu rûite zak map loa an lo che ṭhin a nih chuan kan society ni loin, dan leh thupek ka mawhpuh. Vantlanga hmuna zu rûite hi dan anga hrem a, man fo ni se chuan tu mah an rûi ngam hauhin ka ring lo," a ti.

Zodintluanga Ralte chuan, zu zawrh chu Mizoram sorkarin a hming maiin a titawp nia sawiin, "ZPM Leader-in vantlang hmuna zak miah loa zu rûi an chêt ṭhin thu a sawi hian zu khap hlawhchhamzia a tichiang hle. Kan sorkar hian a hming maiin zu zawrh a khap niin a lang," a ti a, zu tihrêm tumna tak tak nei loah sorkar a puh.

CLP Leader chuan, sorkarin zu zawrh khap siin dan leh thupek kengkawhtu a thuam chak duh si lo tih sawiin, "Kan khawpui ber Aizawl dái maiah zu zuar leh zu lei tur ni tin zan tin an phu suau suau. A duhnaah pawisa a ren loh laiin, zu khap duh sorkar hian Excise department tan sum a nei thei lo. Kan ṭhalaite'n zu an nghei ngawt thei lo a, an hmuh chhun zu ṭha lo an in avangin an thi zawih zawih a ni," a ti.