Lengpui Airport thawm ṭhatin duhthu a sâm lo - DoNER Minister

DoNER minister of state BL Verma chuan, Lengpui Airport thawm ṭhat mek chu inthlanpui hmaa zo tura tih a nih thu a sawi rualin, hna thawh danah a duhthu a sàm loh thu a sawi.

BL Verma hian September 16, Inrinni khan BJP, Mizoram pisaah thu sawiin, "Lengpui Airport sak mek kan enfiah a, duhthu a sâm lo hle. Sorkar laipui suma sak a nih avangin a hun taka hna thawh zawh a nih theih nana hma la tura hriattir an ni a, inthlanpui kan neih hmaa zo hman tura hna thawh a ni," a ti.

Narendra Modi kaihhruai BJP sorkarin hmarchhak state-te a ngai pawimawh hle nia sawiin Verma chuan, "NE state-ah hmasawnna nasa tak a thlen theih nan hmalak a ni a, nasa takin India hmarchhakah pawh hmasawnna a thleng mek a ni," a ti a; Prime Minister kaihhruaina hnuaiah India chu khawvela ram ṭhang duang berte zinga mi a nih thu a sawi.

BL Verma chuan central-a eptu party-te intêl khawmna I.N.D.I.A chungchang sawiin,"Opposition party-te'n corruption-a India ram an eichhiat mai chu duhtâwk loin, INDIA hming nen lam an ru duh hi a buaithlak hle a, hei vang hian India hming tho Bharat tih chu hman a ni ta mek a ni," a ti.