Niminah mi 5 sample endik

Zoram Medical College (ZMC) Covid-19 Laboratory-ah nimin khan mi panga swab sample endik a ni a, Covid-19 an vei lo vek tih hmuh a ni. Hetih lai hian, State Referral Hospital (SRH)-ah nimin khan Covid-19 vei rinhlelh thilah mi pathum dah luh thar an ni.

Nimina SRH-a admit thar mi pathumte swab sample lak nghal a ni a; an zinga pakhat chu nimin khan endik nghal niin, Covid-19 a vei lo tih hmuh a ni. Mi dang pahnihte sample erawh chu vawiinah endik a ni ang. SRH-ah hian damlo mi 10 an awm mek.

Hetih lai hian, quarantine facility-a awm mek mi pakhat chu pum ná vangin May 20, Nilaini zan khan SRH-ah lâk a ni a; doctor-te'n an en hnuah gastric perfora-tion (pumpui pawp) a ni tih hmuh chhuah a ni. Nilaini zan vêk khan hlawhtling taka zai nghal a ni a, Make Shift ICU-ah enkawl zui a ni.

SRH hi Dedicated Covid-19 Hospital-a puan a nih avangin, Covid-19 vei rinhlelh leh khung hran mekte'n eng natna pawh nei se, damdawi-in danga hruai loin, SRH-ah hruai zel tur a nih thu, SRH-ZMC Bulletin chuan a tarlang.

Nilaini tlai dar 5 aṭanga nimin tlai dar 5 thleng khan screening point hrang hrangah Mizorama lut tur mi 929 enfiah an ni a; quarantine centre-a dah thar mi 118 leh home quarantine-a dah thar mi 38 an awm a, rapid antibody test (RAT) hmanga endik mi 38, RT-PCR test tihsak mi paruk an awm bawk.