Maxicab chesualah mi 6 an thi

Zokhawthar leh Aizawl inkara tlan maxicab MZ-01 J-9782 chu nimin zing dar 4:15 vel khan Keifang lam aṭanga Seling thlen hma, Custom checkgate bulah chesualin kawng thlangah a lum a, mi paruk an thih bakah, mi dang pariat an hliam.

Thu dawn danin, maxicab-ah hian a khalhtu Lalchhanhima (23), Hruaikawn Khawthar bakah mi dang 13 an vaiin mi 14 an chuang a; motor hi kawng thlangah metre 100 vel a lum a ni.

Chet sual thu hriat a nih veleh khualzin veivâk leh Seling khaw mipuite'n ruang lak chhuah leh hliam bawihsâwm hna an thawk nghal.

Aizawl aṭang pawhin SP Lalhuliana Fanai leh Aizawl North SDPO PC Lalṭanpuia hoin police eng emaw zat chetsualna hmunah an kal a ni.

Ruang leh hliam tuarte hi zing dar 8 velah lak chhuah zawh a ni a; Seling, Thingsulthliah, Thingsul Tlangnuam leh Sesawng YMA-te'n kuang an siam a ni.

Seling YMA Rûnah thlahna hun hman a nih hnuah, mithite leh hliam tuarte hi Aizawl Civil Hospital panpui an ni a, mithite chu postmortem niin, hemi zawh hian an chhungten an la a ni.

Hliam tuarte pawh an dinhmun endik nghal a ni a, Lalthansangi (2) d/o Hmingthansanga, Rangvamual; Vanlaltawna s/o Sangtinkulha, Hruaikawn; Lalṭhatluanga (17) s/o Vanlaltawna, Hruaikawn Khawthar; Lungmuani (26) d/o JH Lianvela, Chhinga Veng, Aizawlte chu admit an ni. A bak zawng chu in lama enkawl tura chhuah an ni.

Maxicab-ah hian chhungkuaa chuang an awm nual a, motor neitu Vanlaltlawna chu a fapa, lirthei khalhtu Lalchhanchima bakah, a fate dang pahnih nen chuangin, an vaiin an hliam a, amah bak ngaihtuahawm lutuk an awm loa thu dawn a ni. Hliam zinga mi Lalthansangi hi a nu leh pa nen an chuang a, a nu leh pate chu chetsualna hmunah an thi.

Thi zingah mi Joseph Lalduhzuala chu a nu Lungmuani nen an chuang a, a nu hi damdawi-inah admit a ni. Lalrindiki (1) pawh a nu Magdalena @ Lily nen chuangin, a nu hian a thihsan a ni.

Chetsualnaa thite

Hming Veng/khua

Magdalena @ Lily (26) Chawhte, Myanmar

Zothanpuii (36) w/o Hmingthansanga Rangvamual

Hmingthansanga (40) h/o Zothanpuii Rangvamual

Zomuana (59) s/o Thangchungnunga Tamu, Myanmar

Joseph Lalduhzuala (10) s/o Thiamlianvela Chhinga Veng, Aizawl

Lalbiakhnemi (50) w/o Khawlhmingthanga Tamu, Myanmar

Hliam tuarte

Lalthansangi (2) d/o Hmingsawithanga Rangvamual

Vanlaltawna (45) s/o Sangtinkulha Hruaikawn Khawthar

Lalthṭatluanga 17) s/o Vanlaltawna Hruaikawn Khawthar

Lalchhanhima (25) s/o Vanlaltawna Hruaikawn Khawthar

Biakhlupuia (21) s/o Ramtharmawia Hruaikawn Khawthar

Luangmuani (26) d/o JH Lianvela Chhinga Veng, Aizawl

Rampanthanga (20) s/o Lalhruailian Edenthar Veng, Aizawl

Lalrindika (1) s/o Sangliana Chawhte, Myanmar