Model village puanna hun hmang

MNF MLA pahnih, Vanlalzawma leh Lalruatkima ten SAGY hnuaia model village atana an thlante chu nimin khan a hawnna inkhawm hman a ni.

Lalruatkima'n model village atana Khumtung a thlan chu a puanna hun, Khumtung bazarah neih a ni. Hemi hnu hian Vanlalzawma'n model village atana Baktawng a thlan puanna hun, Baktawng community hall-ah neih leh a ni. Model village puanna inkhawm hi bialtu MLA Lalrinawma'n a hmanpui.

Vanlalzawma chuan, Baktawng model village hawnna inkhawmah thu sawiin, model village-in a tum bulpui chu rilru lama hmasawnna a nih thu sawiin, "Ngaihtuahna her dik a ngai a, chu chu hmasawnnain a zui dawn a ni," a ti a; hmasawn tur chuan rilru sûkthlêk dik a ngaih thu a sawi.

Lalruatkima pawhin Khumtungah thu sawiin khuain hma a sawn theihna turin rilru lam hmasawnna a pawimawh ber a ti a, "Sorkarin Aizawl MLA-te thingtlang lama model village thlang ve turin a ti a, duhsak takin Tuikum bial khaw pahnih chu MNF MLA-te'n model village-ah kan thlang a ni," a ti a; faina ngaih pawimawh hmasak a ṭul thu a sawi bawk.