President hoin Governor-te'n conf. nei

President Pranab Mukherjee chuan nimin khan video conference kaltlangin state leh union territory-a Governor leh Lt. Governor-te conference a neihpui a; President-in thu sawi tura a tih Governor paruk zingah Mizoram Governor Lt.Gen. Nirbhay Sharma pawh telin, a pisa aṭangin thu a sawi.

Pranab Mukherjee chuan, Governor-te chu India ram hmasawnna atan Constitutional Head an nihna hre chiang a, ṭha taka judiciary, legislature leh executive-te thawhpui zel turin a chah a, "Kum liam taah khan India tan lawmna tur tam tak a awm. Agriculture sector bikah erawh chuan fûr ruahtui a tam loh avangin duhthu a sâm lo. Kum 2016 chhung hian India chuan hmasawn tam tak a nei dawn a, he hlawhtlinna atan hian centre leh state ṭanrualna a pawimawh hle dawn a ni," a ti.

Larsap Nirbhay Sharma chuan, Mizoram chu lirnghing thlen theihna hmun ṭhen hrang hrang zinga a hlauhawm bera awm a nih thu sawiin, "Mipute him dan tur kawng nasa zawka zawn a pawimawh. Aizawl khawpui, Mizoram mipui 25% chuang awmna pawh a him tâwk lo hle," a ti.

Governor hian disaster audit siam a nih theih nan sorkar laipuiin hma lain, thil hmanhmawhthlak a nih avangin Governor’s Conference neih hunah agenda-ah telh a nih theihna atana pawmsak turin President a ngen a ni.

Inkalpawhna chi hrang hrang leh inbiak pawhna chi hrang hrangah Mizoram leh hmarchhak an hnufual bik tih sawiin Nirbhay Sharma chuan, "MoRTH, MEA leh state aiawhte telna monitoring committee din a nih chuan he harsatna hi sutkian theih a ni ang," a ti.

President hoa video conferencing neihah hian state 31-a Governor-te leh UT pasariha Lt. Governor-te an tel a, President bakah, thlan bik Governor parukin thu an sawi a ni.