Minister-in Champhai stadium sak a tlawh

Sports & Youth Services minister Zodintluanga chuan, nimin khan Champhai Zotlanga sports stadium sak mek a tlawh a; hna thawh mek chu a hun taka an zawh theih dawn avang-in lawm-awm a tih thu sawiin, "Stadium hi ISL thlenna tlak a ni ang," a ti.

Sports Minister chuan, Champhai Zo-tlanga stadium sak mek chu Mizorama stadium puitling neih hmasak ber tur a ni tih sawiin, Ministry of Urban Development sum min pek nuai 2238.69 hmanga sak a ni a. Thawktute kan nawr nasa a, a hun taka an zo thei tur hi a lawmawm hle," a ti a; hmun danga stadium sak mek pawh a hun taka an zawh ngei a duh thu a sawi.

Zodintluanga chuan, tunah hian Serchhip, Kolasib leh Lungleiah stadium sak mek a nih thu leh a hmunah tlawh vek a tum thu sawiin, "Vawi tam kan tlawh tawh a, an thawh chak phah hle. Vawiinah hian synthetic tract siamna tur an siam ṭan mek tawh a, artificial turf pawh an chah thleng tawh a, hma an la chak hle a ni," a ti.

Champhai Sports Stadium sak hna hi March 15, 2014-ah ṭan a ni a, ram sq.metre 23,362-a zau a awh. Football khelmualah phûl lem phah tur a ni a, a sirah intlansiakna synthetic running tract lane pariat siam tur a nih bakah, boxing hall sak tur a ni. A sak hna thawktu chu Balajee Developers an ni.

Sports & Youth Services Minister hian nimin vek khan Hnahlan-ah Hnahlan Zone Inter Village Football Tournament a hawng bawk.