Rohluna'n Industries intuaitharna a hmanpui

Industries department-a officer-te chuan, nimin khan Secretariat conference hall-ah kum 2016 atana intuai tharna hun an hmang a, Industries minister H Rohluna'n a hmanpui.

H Rohluna chuan, an hnathawh tawhah hlawhtlinna tam tak leh rah chhuah ṭha tak tak hmuh tur a awm laiin, hmasawnna tur tam tak a la awm tih a sawi a, "Industries department hi department lian leh senior tak, pawimawh leh thawh chhuah nei ṭha tak a nih avangin kum bul aṭang hian mahni ṭheuh inen lêt a, rilru leh tih tak zeta ram tan hna thawh a ṭul a ni," a ti.

Mipuiin Industries department laka an beisei ang an nih phâk lohna tam tak a awm mah se, thawktute'n ṭan lak nachang an hriat chuan ram hmasawnna kawngah sûlsutu ber an ni thei tih sawiin, Rohluna chuan, Industries department chuan hun lo kal zel turah ram tana mawhphurhna lian tak chu department leh thawktute chungah a innghat tih hria a ṭan la thar zel turin a fuih a ni.

Parliamentary secretary (Industries) Joseph Lalhimpuia pawhin thu sawiin, "Department-a thawktu, a bikin officer-te chu pension hma loh chuan department neitu leh sokar kutke ni reng tur an nih avangin, inthlahdah loa thawh a ngai. Mahni hna ngai pawimawh lo leh mahni awmna tur a awm lo te, thawk ṭha duh lote chu sokar tan hlawh pek reng a harsa ang," a ti.

Meeting hi Industries secretary Zothankhuma'n a kaihruai a, district hrang hrang aṭanga officer telte'n an harsatna tawhte leh an dinhmunte an tarlang.